Pas një rrugëtimi të mbushur me pasion, përkushtim dhe emocione, në Pallatin e Sportit “Feti Borova” në Tiranë u zhvillua Festivali i Parë Kombëtar i Shahut për ciklin e ulët, një aktivitet që u kthye në një festë të vërtetë sportive dhe edukative.

300 nxënës në një sfidë të mendjes dhe strategjisë

300 nxënës nga qytete të ndryshme të Shqipërisë u përballën në tavolinat e shahut, duke treguar inteligjencë, qetësi, durim dhe aftësi strategjike në çdo lëvizje. Për shumë prej tyre ishte eksperienca e parë në një aktivitet kombëtar, ndërsa emocionet dhe adrenalina ndiheshin në çdo ndeshje.

Një atmosferë fantastike u krijua edhe në tribunat e pallatit të sportit, ku prindërit, mësuesit dhe të afërmit ndoqën me shumë emocion lojërat e fëmijëve, duke i mbështetur dhe duartrokitur në çdo moment.

Shahu në shkolla, një investim në edukimin e fëmijëve

Aktiviteti u përshëndet nga Presidenti i KOKSH, z. Fidel Ylli, i cili vlerësoi rëndësinë që ka përfshirja e shahut në shkolla dhe ndikimin pozitiv që ky sport ka tek fëmijët.

Gjithashtu të pranishëm ishin Deputeti dhe Presidenti i Nderit i Shahut, z. Eduart Shalsi, si edhe Presidenti i Federatës Shqiptare të Shahut, GM Erald Dervishi, të cilët përgëzuan të gjithë pjesëmarrësit për nivelin dhe pasionin e treguar gjatë festivalit.

Finalet dhe fituesit e festivalit

Momenti më emocionues i ditës ishin ndeshjet finale, të ndjekura me shumë vëmendje dhe entuziazëm nga të gjithë të pranishmit.